Лаврентьевская летопись:

Ѡ оубьєньи Андрѣєвѣ ჻— В то же лѣт̑ . оубьєнъ бъıс̑ . великъıи кнѧзь Андрѣи . сн҃ъ великаго кнѧзѧ Геѡргиӕ . внукъ Мономаха Володимера . оубьєньѥ же ѥго послѣди скажем̑ . Се блг҃овѣрнъıи А. и хс̑олюбивъıи [великии] Б кнѧзь Аньдрѣи ѿ младъı верстъı Хс̑а возлюби . и всепречс̑тую ѥго мт҃рь . смъıслъ бо ѡчс̑тивъ . и оумъ ӕко полату красну сию създа въ Володимери . и в Бо҃любѣмь . златом же и каменьєм̑ драгъıмъ . и женчюгомъ оукраси ю . иконами безъцѣньнами . и всѧкъıми оузорочьӕми В оудиви . в неиже чюдотворнаӕ мт҃и Бж҃иӕ . к неиже вси хс̑ьӕне съ страхом̑ пририщюще . и с вѣрою . ицѣленьӕ приимають и ина всѧка ст҃ъıни . и и цр҃кви различнъı постави и манастъıри многъı созда . на весь бо црк҃внъıи чинъ и на црк҃овникъı . ѿверзлъ ѥму Бъ҃ ѡчи срдч҃нѣи . не ѡмрачи бо үма | своѥго пьӕньствомъ . кормитель бѣ черньцем̑ и черницѧмъ . и оубогъıмъ . и всѧкому чину . ӕко възлюбленъıи бѧше ѡц҃ь Г. паче же на млс̑тъıню зѣло ѡхотивъ . ибо брашно своѥ и медъ по үлицам̑ на возѣхъ слаше болнъıм̑ . и по затвором̑ . слъıша бо Гс̑а гл҃ща . аще створисте Д братьѣ моєи меншеи . то мнѣ Е створисте Д. и пакъı Дв҃дъ гл҃еть . блаженъ мужь милуӕ и даӕ весь дн҃ь . ѡ Гс̑дѣ ходѧи не поткнетсѧ . мужьство Д Ж же и оумь в немъ живѧше . правда же и истинна с ним̑ ходѧста. и иного добродѣӕньӕ много в немь бѧше . вторъıи мудръıи Соломонъ бъıвъ . тѣмь достоино ѿ Ба҃ побѣднъıи вѣнець всприӕлъ ѥси . Андрѣю мужьству Ж тезоимените . братома бо боо҃умнъıма З вслѣдовалъ ѥси кровью ѡмъıвъсѧ страданьӕ ти . аще бо не напасть . то не вѣнець . аще ли не мука . [то] И ни дарове . всѧкъıи бо держасѧ добродѣтели не може безъ многъıхъ врагъ бъıти І. и вражденоє оубииство слъıшавъ напереди до сего. дх҃мь бжс̑твенъıмъ разгорѣвъсѧ . и ни во чтоже вмѣни . тѣмь в памѧт̑ оубьєньӕ твоѥго оудивишасѧ нбс̑нии анг҃ли . видѧще кровь твою прольємую за Хс̑а ръıдаѥть же множьство правовѣрнъıх̑ . зрѧще ѡц҃ѧ сиръıмъ и коръмителѧ . ѡмраченъıмъ звѣзду свѣтоносну помрачаѥму. ѡканьнии же твои оубиицѣ . ѡгнемь крс̑тѧтсѧ конечнъıм̑ . иже ижигаѥть всѧкого грѣха купину. рекше дѣӕньє . тъı же стртпче молисѧ . къ всемогущему Бу҃ . дати миръ мирови Оубьѥн же бъıс̑ . мс̑цѧ . июнѧ . въ . к҃ѳ . дн҃ь на памѧт̑ . ст҃ою апс̑лу . Петра . и Павла . в суб̑ту на ночь . Началникъ же оубиицѧмъ Петръ Кучковъ зѧть. Аньбалъ Ӕсинъ ключник̑ . Ӕкъıмъ Кучковичь. а всѣхъ невѣрнъıх̑ оубииць . числомъ . к҃ . Иже сѧ бъıли снѧли . на ѡканьнъıи свѣтъ. того дн҃и . оу Петра оу Кучкова зѧтѧ . постигши бо ночи суботь|нѣи . вземше ѡружьє ӕко звѣрьє дивии . придоша идеже бѣ блж҃нъıи кнѧзь . лежа в ложници. и силою ѿломиша двери оу сѣнии . блж҃нъıи же вскочи . и хотѣ взѧти мечь . и не бѣ ту меча . бѣ бо въıнѧлъ Аньбалъ того дн҃и ключник̑ ѥго . то бо мечь бѧше стаг̑ Бориса . ѡканьнии же всовашасѧ в ложницю вси . [и] А сѣкше ѥго саблѧми и мечи . идоша прочь . ѡн же во торопѣ вскочь по них̑ . начатъ ригати . и гл҃ти в болѣзни срд̑цѧ . ѡни же глас̑ оуслъıшавше воротишасѧ на нь ѡпѧт̑ . ѡн же подъбѣже подъ сѣни налѣзъше ѥго ту и скончаша и . Петръ же 4 ѥму ѿтѧ руку десную . оубьѥн же бъıс̑ в суб̑ту на ночь . и ѡ свѣте заоутра мертвъ в нед̑лю . на памѧть . вı҃ . апс̑лу . Налѣзоша и подъ сѣньми лежаща . вземше и на коврѣ клирошане Бо҃любьскъıи . внесоша и в божницю . пѣвше надъ нимь вложиша и в гробъ каменъ . горожане же Бо҃любьскъıи . и дворане Б разграбиша . домъ кнѧжь . и дѣлатели иже бѧху пришли к дѣлу . злато и сребро портъı и паволокъı . и имѣньє ѥмуже не бѣ числа . и много зла створисѧ в волости ѥго . посадникъ ѥго и тиоуновъ ѥго . домъı пограбиша . а самѣхъ избиша . дѣтьцкъıѣ и мечникъı избиша . а домъı ихъ пограбиша . не вѣдуче гл҃емаго . идѣже законъ В ту и ѡбидъ много . и пакъı Павелъ апс̑лъ гл҃еть . всѧка дша властелемъ повинуєтсѧ . власти бо ѿ Ба҃ оучинени сут̑ . єстьствомъ бо земнъıм̑ . подобенъ єсть всѧкому члв̑ку цс̑рь . властью же сана ӕко Бъ҃ . вѣща бо великъıи Златоүстець тѣмже противѧтсѧ волости . противѧтсѧ закону Бж҃ью . кнѧзь бо не туне мечь носить . Бж҃ии бо слуга єсть . но мъı на преднѧӕ возвратим̑сѧ .