Летопись по Типографскому списку:

В лѣто 6886 приидоша Татарове изгономъ к Новугороду Нижнему. Князь же не бѣ на городѣ, но на Городцѣ, а гражане, поврьгше градъ, бѣжаша за Волгу. И посла князь Дмитрей къ Татаромъ, дая имъ окупъ з города. Они же не взяша окупа и пожгоша градъ. И отшедше, повоеваша Березовъ, Поле и уездъ весь и много зла сътвориша и отъидоша. О побоищи, иже на Вожи . Того же лѣта Ординский князь Мамай поганы, събравъ воа многы и посла Бѣгыча ратию на великого князя Дмитреа Ивановича и на всю землю Русскую. Се же слышавъ князь великий Дмитрей Ивановичь и събравъ воа многы, и поиде противу ихъ съ многою силою своею. И перешедъ рѣку Оку и поиде в землю Рязаньскую и срѣтеся с Татары на рецѣ на Вожи. И стояху промежи собою о рецѣ о Вожи немного дний, потомъ же переидоша Татарове на сю сторону и ударивша в кони свои, кликнуша и скочиша вборзѣ и потомъ на грунахъ поидоша; Рустии же полци потекоша противу имъ. И удари на нихъ съ сторону князь Данило Пронский, а Тимофѣй, околничей великого князя, с другую сторону, а князь великый с полки своими в лице. Татарове же в томъ часѣ поврѣгша копиа своа и побѣгоша за рѣку Вожю, и князь же великый погна за ними с полки своими, избиваа ихъ, и множество избиша ихъ, а инии в рецѣ истопоша. А се имена избитыхъ князей Татарскихъ: Хазибий, Коверга, Карубулукъ, Кострокъ, Бегичка. По сихъ же приспѣ вечеръ и зайде солнце и бысть нощь, и не лзѣ бѣ гнатися за ними за рѣку. Въ утрии же бѣ мгла велика, а Татарове такыи побѣгоша с вечера и черезъ всю нощь бѣгоша. Князь же великый на утрии уже предъ обѣдомъ поиде по нихъ слѣдомъ ихъ и, шедше далече за ними, обрѣтоша в поли повръжены дворы ихъ и вежи и шатры и телѣги ихъ, а в нихъ товару многое множество, то все помѣташа, а самихъ не обретоша, бяху бо такии побѣгли къ Ордѣ. Изъимаша тогда на войнѣ той нѣкотораго попа, оть Орды пришедша, Иоаннова Васильевича, и обрѣтоша у него злыхъ и лютыхъ зелей мѣшокъ и истязавше его много и послаша его в заточение на Лаче озеро, идеже бѣ Данилъ Заточеникъ. Великый же князь Дмитрей Ивановичь възвратися к Москвѣ съ побѣдою великою и съ многою корыстью и рати разспусти кыйждо въсвоаси. Убьен же бысть тогда на томъ бою Дмитрей Монастыровъ да Назаръ Даниловъ Кусакова. Бысть же побоище сего мѣсяца августа въ 11, в среду, при вечерѣ. Окааннии они Измаилтѣни, елици уидоша со бою того, прибегоша въ Орду къ царю своему, паче же к пославшему ихъ Мамаю, понеже царя имѣаху у собя въ Ордѣ невладьюща ничем же предъ Мамаемъ, но все старейшиньство сдержаше Мамай и всѣми владѣаше въ Ордѣ. Видѣвше Мамай изнеможение посланыхъ отъ него, избьение князей Ординскихъ и множество во нихъ изгибшихъ, и възьярися зѣло и събра остаточную силу и поиде изгономъ на Рязанскую землю. Князь же Олегъ Рязанский не успѣ собрати силы своеа вборзѣ и не ста противу на бой, но покинувъ градъ свой и перебежеа на сю сторону рѣки Оки и съ всѣми людми своими. Татарове же, пришедше, взяша градъ его Переаславль и огнемъ пожгоша. Волости же и села повоева, а людей много посѣкоша, а иные в полонъ поведоша и възвратишяся въ страну свою и много зла сътвориша. Того же лѣта бысть великъ мятежъ в Литвѣ, Богу попущешу на нихъ гнѣвъ свой, въсташа сами на ся и убиша великого князя Кестутиа Гедимановичь и бояръ его избиша, а сынъ его, князь Витовтъ, бѣже в Нѣмцы и много зла твори земли Литовской, подъялъ бо бяше Кестутей великое княжение подъ княземъ Ягайломъ.