Русская летопись:

Изѧславъ же не хотѧше ис Киева поити . зане оулюбилъ бъı Киевъ ему . Ст҃ославъ же ѡста Чернигову а Дюрги ѡста оу Моровииска. и посла Дюрги къ Изѧславу река . мнѣ ѿц҃ина Киевъ . а не тобѣ. Изѧславъ же присла къ Дюргеви. молѧсѧ и кланѧӕсѧ река ци самъı есмь ѣхалъ Киевѣ. посадили мѧ Киӕне а не створи ми пакости а се твои Киевъ. Дюрги же млс̑твъ съıи ѿда ему гнѣвъ и тако въıиде Изѧславъ ис Киева И тако Дюрги бл҃годарѧ Ба҃ вниде въ Киевъ. въıиде противу ему множьство народа и сѣде на столѣ ѡц҃ь своихъ и дѣдъ и приӕ с радостью всѧ землѧ Рускаӕ. тогдъı же сѣдъ раздаӕ волости дѣтемъ . Андрѣӕ посади Въıшегородѣ . а Бориса Туровѣ . Глѣба в Переӕславли . а Василкови да Поросье